ಕಮಲ


ತಾವರೆಯು ತಾನಾಗಿಯೇ

ಸಂತಸವ ಸೂಸುತ।

ಕೆಸರಲಿದ್ದರೇನು ಕೇಡು?

ನೋಡು ಬಾನಿನತ್ತ॥


ಮೊಗ್ಗು ನೀನು ಅರಳಬಹುದು

ರವಿಯ ನೋಡಿ ಅರಳು।

ನೋಡಿದವರಿಗೆಲ್ಲ ನೀನು

ಆಹ್ಲಾದವ ತರಲು॥


ಕರಿಯ, ಬರಿಯ ಕೊಳಕು ಕೆಸರು

ಬಹಳ ಕೊಳದ ಆಳ।

ಹೀರಿ ನೀನು ಅದರ ರಸವ

ನಡೆಸು ಚೆಂದ ಬಾಳ॥


ತೇಲಲಿಂದು ನೀರ ಮೇಲೆ

ತೋಯದಂತೆ ಎಲೆಯು।

ಬಿದ್ದರೇನು ಹನಿಯ ನೀರು

ಮುತ್ತಾಗಿಪ ಜಾಣ ಕಲೆಯು॥



ಕಾಮೆಂಟ್‌ಗಳು

  1. NSMಆಗಸ್ಟ್ 24, 2026 ರಂದು 07:28 PM ಸಮಯಕ್ಕೆ

    ಈ ಕವನ ನನ್ನ ಗುರುಗಳಾದ ಶ್ರೀ ಶಂಕರ ಶಾನುಭೋಗ್‌ ಅವರಿಗೆ ಸಮರ್ಪಿತ.

    ಪ್ರತ್ಯುತ್ತರಅಳಿಸಿ
  2. Pradeep NSಆಗಸ್ಟ್ 24, 2026 ರಂದು 07:39 PM ಸಮಯಕ್ಕೆ

    ಅಧ್ಬುತ ಸಾಲುಗಳು

    ಪ್ರತ್ಯುತ್ತರಅಳಿಸಿ
  3. ಅನಾಮಧೇಯಆಗಸ್ಟ್ 24, 2026 ರಂದು 08:27 PM ಸಮಯಕ್ಕೆ

    Awesome words

    ಪ್ರತ್ಯುತ್ತರಅಳಿಸಿ
  4. Shankarಆಗಸ್ಟ್ 25, 2026 ರಂದು 02:20 AM ಸಮಯಕ್ಕೆ

    Dear sir , very nice and well presented. This relates to humanity very much. Meaning, forget the past, (roots, circumstances etc)
    Show best and beautiful results now. Every one will see the present and appreciate you

    ಪ್ರತ್ಯುತ್ತರಅಳಿಸಿ
  5. ಅನಾಮಧೇಯಆಗಸ್ಟ್ 28, 2026 ರಂದು 08:15 PM ಸಮಯಕ್ಕೆ

    ಮತ್ತೆ ಮತ್ತೆ ಓದುವಂತೆ ಮಾಡುತ್ತದೆ. ಬಹಳ ಹಳೆಯ ವಿಷಯದಲ್ಲಿ ವಿಭಿನ್ನ ಮತ್ತು ಹೊಸದು! ತುಂಬಾ ಒಳ್ಳೆಯ ಪ್ರಯತ್ನ.

    ಪ್ರತ್ಯುತ್ತರಅಳಿಸಿ

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಕನಸುಗಳು

ಇಮೇಜ್
🔊 Click here for audio recitation 🎵 Click here for song ಬೆಚ್ಚನೆಯ ನಿನ್ನೆಗಳ ಕಂಬಳಿಯ ನಾ ಹೊದ್ದು ಕನಸುಗಳನರಸುವೆನು ಕಣ್ಣ ಮುಚ್ಚಿ॥ ಬಲು ಭಾರದಾ ಕಂಬಳಿಯ ನಾ ಬಿಚ್ಚಿ ಈ ಬಿಸಿಯೊಳು ನಾ ಹೊದ್ದುದೇಕೆ? ಬೆವರುತಿಹೆ ಕನಸಿನೊಳು ಹಿಂದಿನದ ನೆನೆಯುತ್ತ ನಿನ್ನೆಗಳಿಗಿದು ಎಂಥ ಪರಿತಾಪವು? ಬೆಚ್ಚನೆಯ ನಿನ್ನೆಗಳ ಕಂಬಳಿಯ ನಾ ಹೊದ್ದು ಕನಸುಗಳನರಸುವೆನು ಕಣ್ಣ ಮುಚ್ಚಿ॥ ಬಯಲಿನ ಚಳಿಗೆ ಇಂದು ಕಂಬಳಿಯ ಬಯಸಿದೆನು ಮೈಗೆಲ್ಲ ಮುದಕೊಟ್ಟು ಶಾಖವಿತ್ತು। ಹಿಂದೆಗೈದಾ ಸುಕೃತ ಮರಳಿ ನನ್ನನು ಸುತ್ತಿ ಕಾಪಾಡುತಿಹುದೇನು ರಕ್ಷೆಯಿಟ್ಟು? ಬೆಚ್ಚನೆಯ ನಿನ್ನೆಗಳ ಕಂಬಳಿಯ ನಾ ಹೊದ್ದು ಕನಸುಗಳನರಸುವೆನು ಕಣ್ಣ ಮುಚ್ಚಿ॥ ಒಮ್ಮೊಮ್ಮೆ ಬೇಸರವು ಬೇಡೆನಗೆ ಕಂಬಳಿಯು ತಳ್ಳಿದೆನು ಕಂಬಳಿಯನಾಚೆ ನಾನು  ಅದರ ಆಸರೆಯು ಬೇಕೇನು ಇಂದೆನಗೆ ನೋಡುವೆನು ಹೊಸ ಕನಸ ನಾಳೆಗೆಂದು॥ ನಿನ್ನೆಗಳ ಕಂಬಳಿಯು ಬೇಡವಿನ್ನೋ  ಜಾಣ ಹೊಸ ಕನಸುಗಳನರಸುವೆನು ಕಣ್ಣ ತೆರೆದು॥
Read more »

ಉಗಾದಿ

ಇಮೇಜ್
  🔊 Click here and listen to audio recitation ಚಂದ್ರನಡಿಗೆ ನಮ್ಮ ನಡಿಗೆ ಇದು ಶುಕ್ಲ ಕೃಷ್ಣ ತಾಳಕೆ। ಋುತುಚಕ್ರವು ಉರಳಿತು ತಂದಿತು ಉಗಾದಿಯು॥ ಮಾಗಿ ಮಾಗಿ, ಗ್ರೀಶ್ಮ ಬಂದು ತರುಲತೆಗೆ ಶೋಭೆ ತಂದು। ಮಾವು, ಬೇವು ಬೇರೆನ್ನದೆಯೆ ಎಲ್ಲದಕ್ಕು ಹಸಿರನುಡಿಸಿ, ಋುತುಚಕ್ರವು ಉರಳಿತು ತಂದಿತು ಉಗಾದಿಯು॥ ಎಳೆಯ ಹಸಿರು ಹೊಸೆದುಸಿರು ಕೋಗಿಲೆಗೂ ಗಾನ ಹುರುಪು। ಮಾವಿನಡಿಯ ನೆರಳಿನಲ್ಲಿ ಪಂಚಮದಲಿ ಹಾಡಿದೆ, ಋುತುಚಕ್ರವು ಉರಳಿತು ತಂದಿತು ಉಗಾದಿಯು॥ ಸಿಹಿ ಕಹಿಯು ಜಿಹ್ವ ಸತ್ಯ ಕಷ್ಟ ಸುಖವು ಅನುಭವದ ಸತ್ಯ। ಮರಮರಳಿ ಸುತ್ತ ಸುತ್ತಿ ಮಾಯೆ, ಸತ್ಯಗಳನು ಕದಡಿ ಜಾಣ ಮತ್ತೆ ಪೇಳಿದ ಋುತುಚಕ್ರವು ಉರಳಲಿ ಬರಲಿ ಮತ್ತೆ ಉಗಾದಿಯು॥ - ನಾ ಶ್ರೀ ಮೋ
Read more »

“ಕಳೆದ” ಸ್ನೇಹ

ಇಮೇಜ್
🔊Click here for audio recitation ಹಿಂದೆ ಕಳೆದ ದಿನವ ನೆನೆದು  ಇಂದು ನನ್ನ ನಾ ಕೇಳಿದೆ –  ಎಂದು ಹೇಗೆ ಕಳೆದು ಹೋಯ್ತು  ಸಂದ ಸ್ನೇಹ ಸಲಿಗೆಯು? ಬಿಚ್ಚಿ ಮನದಿ ಮಾತನಾಡಿ  ಹೃದಯದಾಳದಿಂದ ಬಂದ  ಚಿಕ್ಕ ಮಾತಿಗೆಲ್ಲ ನಕ್ಕ ಎಂದು ಹೇಗೆ ಕಳೆದು ಹೋಯ್ತು  ಸಂದ ಸ್ನೇಹ ಸಲಿಗೆಯು? ಮೌನ ಮುಳ್ಳು ಮನವ ಚುಚ್ಚಿ  ಸಿಹಿಯ ಬಿಟ್ಟು ಕಹಿಯನುಂಡು  ಎರಡು ದಡದಿ ನಿಂತು ನಾವು  ನಡುವೆ ಕಾಲ ನದಿಯು ಹರಿದು  ಎಂದು ಹೇಗೆ ಕಳೆದು ಹೋಯ್ತು  ಸಂದ ಸ್ನೇಹ ಸಲಿಗೆಯು? ತಿಳಿಯಲಿಲ್ಲ ಅರಿಯಲಿಲ್ಲ  ಎಂದು ಸಂದು ಬಿರುಕು ಬಿಟ್ಟು  ಬಿರುಕು ಇಂದು ಕಣಿವೆಯಾಗಿ  ಇತ್ತ ನಾನು, ಅತ್ತ ನೀನು  ಎಂದು ಹೇಗೆ ಕಳೆದು ಹೋಯ್ತು  ಸಂದ ಸ್ನೇಹ ಸಲಿಗೆಯು? ನನ್ನ ಬೆಟ್ಟದಲ್ಲಿ ನಾನು  ನಿನ್ನ ಬೆಟ್ಟದಲ್ಲಿ ನೀನು  ದೂರ ನೋಟದಲ್ಲಿ ಕಂಡು  ಕೂಗಿಗೆಲ್ಲ ಪ್ರತಿಧ್ವನಿಯು  ಎಂದು ಹೇಗೆ ಕಳೆದು ಹೋಯ್ತು  ಸಂದ ಸ್ನೇಹ ಸಲಿಗೆಯು? ಮರೆಯಲಿಲ್ಲ ಗೆಳೆಯ ನಿನ್ನ  ನನ್ನ ನೀನೂ ಮರೆತೇ ಇಲ್ಲ  ನನಗೂ ನಿನಗೂ ಬಿಡುವೇ ಇಲ್ಲ ಎಂದು ನಾವೇ ಅಂದುಕೊಳುತ  ಹೀಗೇ ಕಳೆದು ಹೋಗಲೇ  ಜಾಣ, ಆ ಸ್ನೇಹ ಸಲಿಗೆಯು?
Read more »