ಪರಿತಾಪ

 

An AI generated Image (NSM 30112024)

Click here for Audio recitation
ನನ್ನ ಕಣ್ಣೀರಿರಲಿ ನನ್ನಾತ್ಮ ಶುದ್ದಿಗೆ
ಬರಿಯ ತೋರಿಕೆಯಲ್ಲ, ಅಂತರಾತ್ಮನ ಕೂಗು।
ಪರಿತಪಿಸಿ ಕೊರಗುತಿಹೆ, ಪಾಪಕ್ಕೆ ಪರಿಹಾರ
ನನ್ನ ಕಣ್ಣೀರಿರಲಿ ನನ್ನಾತ್ಮ ಶುದ್ಧಿಗೆ॥

ಬ್ರಾಹ್ಮಿಯಲಿ ನಾನೆದ್ದು, ಆಗಸವ ನೋಡಿದೆನು।
ನೋಡನೋಡುತಲೆದ್ದ ಉದಯ ರವಿಯು।
ಹಕ್ಕಿಗಳ ಸಂತಸದ ಸಂಭ್ರಮಕೆ ಸೋತಮನ
ನನ್ನ ಅರಿವಿಗೆ ಮೀರಿದೀ ಬಾಷ್ಪಗಳು।
ನನ್ನ ಕಣ್ಣೀರಿರಲಿ ನನ್ನಾತ್ಮ ಶುದ್ಧಿಗೆ॥

ಕೃತ ಹಲವು ಪಾಪಗಳು, ಹೇಳಲಾರದ ತಾಪ।
ನಿಜದಿ ಪರಿತಪಿಸುತಿರುವೆ, ಗತ ಕಾರ್ಯಕೆ।
ಅಳಿಯಲಾಗದು, ಅದಚ್ಚೊತ್ತಿ ಕೂತಿಹುದು
ಅದ ನೆನೆದು ಇಂದು ನಾ ತೊಳಿಯಲಿಚ್ಚಿಸಲು
ನನ್ನ ಕಣ್ಣೀರಿರಲಿ ನನ್ನಾತ್ಮ ಶುದ್ಧಿಗೆ॥

ಪರಬ್ರಹ್ಮನೆಡೆ ನಡೆಯುವುದ ನಾ ಮರೆತು।
ಮೆರೆದೆ ಮಿತಿಮೀರಿ ನಾನು ಎನ್ನಹಂಕಾರದಿ।
ಅದರ ಅರಿವು ಇಂದಾಗಿ ಕೊರಗಿ ಕರಗಿದ ಮನ
ಕರಗಿ ಕಣ್ಣೀರಾಗಿ ಈಗ ಹೊರ ಹೊಮ್ಮಿದೆ
ನನ್ನ ಕಣ್ಣೀರಿರಲಿ ನನ್ನಾತ್ಮ ಶುದ್ಧಿಗೆ॥

ಆತ್ಮಕ್ಕೇನು ಬಿಸಿ ಧಗೆಯು, ಅದಕೇನು ಶೀತೋಶ್ಣ?
ಅದಕೆಲ್ಲಿಯ ಕೊರಗು, ಸಂತಾಪ ಮೈಲಿಗೆಯು।
ಅದಕೆಲ್ಲಿಯ ಸುಖ ದುಃಖ, ಅದಕೇನು ಏರಿಳಿತ?
ಸಮಚಿತ್ತಕೆ ಹಾತೊರೆದು, ಹುಲುಬುತ್ತ ಹಂಬಲಿಸೆ
ನನ್ನ ಕಣ್ಣೀರಿರಲಿ ಜಾಣ ಮನ ಶುದ್ಧಿಗೆ॥

- ನಾ ಶ್ರೀ ಮೋ

ಕಾಮೆಂಟ್‌ಗಳು

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಮರ

ಇಮೇಜ್
  Click here for audio recitation 🔊 ಮರವಾಗಿ ಇರಬೇಕು ನಾನು ಈ ಧರೆಯೊಳಗೆ ಚಂದದ ತರುವಿನಿಂಜೀವನದ ಅರಿವಾಗೆ ಮರವಾಗಿರ ಬೇಕು ನಾನು ಈ ಧರೆಯೊಳಗೆ॥ ಆಳ ಆಳಕೆ ಹೊಕ್ಕಿ ಧರಣಿಯೊಳು ಧೃಡವಾಗಿ ಹರಡಿ ಈ ಭುವಿಯೊಳಗೆ ಭದ್ರ ಬುನಾದಿಯೆನಿಪ। ಬಲು ಹಳೆಯ ಕಾಣದಾ ಬೇರನು ನಾ ಹೊಂದಿ  ಮರವಾಗಿರಬೇಕು ನಾನು ಈ  ಧರೆಯೊಳಗೆ॥ ಮೇಲ್ಮೇಲಕೆ ಏರಿ ಗಗನದಲಿ ವಿಸ್ತರಿಸಿ ಚಾಮರದಂತೆ ಚಾಚಿ ದಿಕ್ಕುಗಳ ದಿಕ್ಕರಿಪ। ಹಚ್ಚ ಪಚ್ಚೆಯ ಹುರುಪ ತೋರುವ ಮರವಾಗಿರಬೇಕು ನಾನು ಈ  ಧರೆಯೊಳಗೆ॥ ಥಕ ಥೈಯೆಂದು ತಂಗಾಳಿಯಲಿ ನೃತ್ಯವನಾಡಿ ಬಿರುಗಾಳಿಯಲಿ ಧೃತಿಗೆಡದೆ ಛಲದಿನಿಂತಿರ್ಪ। ಸದೃಡ ಸಶಕ್ತ ಕೊಂಬೆ ಖಾಂಡಗಳುಲ್ಲ ಮರವಾಗಿರಬೇಕು ನಾನು ಈ  ಧರೆಯೊಳಗೆ॥ ಚಿಲಿ ಪಿಲಿ ಹಕ್ಕಿಗಳ ಗೂಡಿಗಾಶ್ರಯವಾಗಿ ಹರಡಿ ಛಾಯೆಯ ಚೆಲ್ಲಿ ಪಯಣಿಗಗೆ ತಣಿಪ। ದಾರಿಯಲಿ ಗುರುತಾಗಿ ಸುತ್ತ ಕಟ್ಟೆಯನಿಟ್ಟ ಮರವಾಗಿರ ಬೇಕು ನಾನು ಈ  ಧರೆಯೊಳಗೆ॥ ಮುದದಿ ಒಂದು ದಿನ ಮುಂದೊಮ್ಮೆ ಮುದಿಯಾಗಿ ಹೇಗಾದರೂ ಸರಿಯೆ ಇತರರಿಗೆ ಆಸೆಯ ಮಣಿಪ। ಒಲೆ ಉರುವಲು ಆಗಿ, ಮನೆಯ ಪೀಠೋಪಕರಣವೆಯಾಗಿ ಮರವಾಗಿರ ಇದ್ದಿರಬೇಕು ಜಾಣ ಈ  ಧರೆಯೊಳಗೆ॥
Read more »

ಅಗಲಿಕೆ

ಇಮೇಜ್
  ಚಿಲಿಪಿಲಿಯಾ ಧ್ವನಿಯು ಅಂದು ಬೇಕು ಬೇಕೆಂಬ ಕಳಕಳರವ ಹಾರಿ ದೂರದಿಂದ ತಂದ ಹಣ್ಣು ಹುಪ್ಪಟೆಯ ತಿಂದು ರಕ್ಕೆ ಬಲಿತು ಪುಕ್ಕ ಬೆಳದು ಗೂಡ ಸುರಕ್ಷತೆಯ ತೊರೆದು ಹಾರಲೆಂದು ಗರಿಯಕೆದರಿ ಗೂಡ ಹೊಸ್ತಿಲ್ಲಲ್ಲಿ ನಿಂತು ಹೋಗಿಬರುವೆ ನಾನು ಎಂದು ರಕ್ಕೆ ಚಾಚಿ ನಿಂತ ಮಗುವೆ ಶುಭದ ಹಾರೈಕೆ ನಿನಗೆ ಕಣ್ಣು ತುಂಬಿ ನೀರು ಹರಿದು ಎದೆಯ ನೋವ ಅದುಮಿ ಹಿಡಿದು ಮುಗುಳುನಗೆಯ ಬೀಸಿ ಹಿಗ್ಗಿ ಸಂತಸದಿ ಶುಭವಕೋರಿ ಗೆಲ್ಲು ನೀನು ಜಗವನ್ನೆಲ್ಲ ಹಂಚು ಜಗಕೆ ಸಿಹಿಯ ಬೆಲ್ಲ ಬಾರದಿರಲಿ ಕಷ್ಟವೆಲ್ಲ ಇರಲಿ ನೀರಸ ನನಗೆ ಎಲ್ಲ ನಿಶಬ್ಧದ ಗೂಡಿನಲ್ಲಿ ಕಾದು ಕುಳಿತೆ ನಿನ್ನ ದನಿಗೆ ಬರಲಿ ಸಂತಸದಾ ಆ ಸುದಿನ ಮತ್ತೆ ನಿನ್ನ ಮರಳಿಕೆ ಇರಲಿ ಈ ಕ್ಷಣಕೆ ನನ್ನಲ್ಲಿ ದುಃಖದ  ಈ ಅಗಲಿಕೆ
Read more »

ಗೀತಕ್ಕನ ಹಕ್ಕಿ

ಇಮೇಜ್
    ಚಿತ್ರ ಕೃಪೆ: ಗೀತಕ್ಕ Click here for audio recitation 🔊 ಹಾರ ಹೊರಟ ಹಕ್ಕಿಯೇಕೊ ರಕ್ಕೆ ಮುದುರಿ ಕೂತಿತೋ। ಯಾವುದರ ನೆನೆಪಾಗಿ ತಾನು ಮೈ ಮರೆತು ಹಾಡಿತೋ? ಸುತ್ತ ಕೇಳಲಾರೂ ಇಲ್ಲ ಪಂಚಮದಲ್ಲಿ ಗುನುಗಿತೊ। ಕೇಳಲೆಂದು ಹಾಡಿತೇನು ತನ್ನತನವ ಮರೆಯುತ? ಅದರ ಇಂಪು ತಿಳಿಯದದಕೆ ಕಂಠ ಬಿಚ್ಚಿ ಹಾಡಿದೆ। ಮೈ ಮರೆತು ನಿದ್ದೆಗೈದ ಬೇಡನನ್ನು ಕಾಡಿದೆ! ಬೇಡನೆದ್ದ ಬೆಚ್ಚಿ ಬಿದ್ದು ಚಿನ್ನ ಕಂಠ ಕೂಗಿಗೆ। ಸರ್ರನೆದ್ದು  ಬೀಸಿ  ಬಲೆಯ  ಪಂಜರದಿ ಅದ ತುಂಬಿದ! ಹಾರ ಹೊರಟ ಹಕ್ಕಿಯಿಂದು ದೂರ ಹಾರದಾಗದಾಯಿತೆ। ಜಾಣತನವ ತೋರದದಕೆ ಇಂದು ಶಿಕ್ಷೆಯಾಯಿತೆ? ಪಂಜರದಾ ಹಕ್ಕಿಗಿನ್ನು ಬಿಡುಗಡೆಯೇ ಇಲ್ಲವೆ? ಸಿಕ್ಕ ಹಕ್ಕಿ ರಕ್ಕೆ ಕಡಿದು ಇನ್ನು ಹಾರಲಾರದೆ? ಬೇಡ ಬಂದ ಜಂಭದಿಂದ ತೋರಿದನಾ ಹಕ್ಕಿಯ। ಪುಟ್ಟ ಮಗುವಿಗಿದೇ ಸರಿ ಎಂದನಾ ಸಿರಿವಂತನು॥ ಕೊಂಡನವನು ಬೇಡನಿಂದ ಅವ ಬೇಡಿದ ಹೊನ್ನಕೆ। ಚಿಕ್ಕ ಮಗುವಿಗೆಂದ ನಗುತ ಇದೋ ನಿನ್ನಾಟಿಕೆ॥ ಮಗುವು ಮುಗ್ಧ ಮನದಿ ನೋಡಿ ಹಕ್ಕಿ ಹಾಡಲೆಂದು ಕೇಳಿತು। ಪಂಜರದಾ ಹಕ್ಕಿಯದು ಮೌನದಲ್ಲಿ ನೋಡಿತು॥ ಅದರ ತೊಳಲನರಿತ ಮಗುವು ಹಕ್ಕಿ ಪಟಕ ತೆರೆಯಿತು। ಹಾರಿ ಹೋಗಿ ಹಕ್ಕಿ ಮಗುಗೆ  ಹಾಡೊಂದನು ಹಾಡಿತು॥ ಕಲಿತೆ ಪಾಠ ನಾನು ಇಂದು ಎಂದೆಂದಿತು ಹಕ್ಕಿಯು। ಏನೆಂದು ಕೇಳೆ ಮಗುವು ಜಾಣ ಹಕ್ಕಿ ನಕ್ಕು ಹಾರಿತು॥ ⁃ ನಾ ಶ್ರೀ ಮೋ Translated Why did the bird that soared so high Fold its win...
Read more »